ඇමෙරිකනුවන්ට ප්‍රහාරයක් එල්ල වේවි යැයි බියක්

පාකිස්තානයේ ඉස්ලාමාබාද් අගනුවර, ඇමෙරිකන් තානාපති කාර්යාලය, පාකිස්තානයේ රැඳී සිටින ඇමෙරිකානුවන්ට අනතුරු ඇඟවීමක් කළේය. ඒ, ඇමෙරිකානුවන් බොහෝ දෙනකු නවාතැන් ගන්නා සහ නිතර ගැවසෙන ඉස්ලාමාබාද් අගනුවර පිහිටි සුඛෝපබෝගී ‘මැරියට්’ හෝටලයට ත්‍රස්ත ප්‍රහාරයක් එල්ල වීමට ඉඩ ඇති බව පෙන්වා දෙමිනි.

නත්තල් නිවාඩු දින කීපයේ ‘මැරියට්’ හෝටලයට ත්‍රස්ත ප්‍රහාරයක් එල්ල වීමට ඉඩ ඇති බවත්, ත්‍රස්තයන්ගේ ඉලක්කය වනු ඇත්තේ හෝටලයේ සිටින ඇමෙරිකානුවන් ඇතුළු විදේශිකයන් බවත් තානාපති කාර්යාලය අනතුරු අඟවමින් පවසා තිබුණි. නත්තල් සමයේ පාකිස්තානයේ සිටින විදේශිකයන් එක් රොක් වී විනෝද වන්නේ ‘මැරියට්’ හෝටලයේය.

ඇමෙරිකන් බුද්ධි අංශ සහ රජය, ඔවුන්ගේ තානාපති කාර්යාලය හරහා අනතුරු ඇඟවීම කළේ ඔවුන්ට ලැබුණු තොරතුරු අනුවය. පාකිස්තාන රජය සහ බුද්ධි අංශ දමේ සම්බන්ධයෙන් දැනුවත් කළ බව ඇමෙරිකන් රජය පැහැදිලි කර ඇත.

පසුගිය සිකුරාදා (23) ඉස්ලාමාබාද් අගනුවර ජනාකිර්ණ ප්‍රදේශයක බෝම්බ පිපිරීමක් ද සිදුවිය. එය මරාගෙන මැරෙන බෝම්බ ප්‍රහාරයක් බව පාකිස්තාන පුවත් සේවා වාර්තා කළේය. එම සිද්ධිය සහ එල්ල වේවි යැයි සැක කරන ත්‍රස්ත ප්‍රහාරය අතරේ සම්බන්ධයක් තිබිය හැකි යැයි ඇමෙරිකන් බුද්ධි අංශ සැක කරයි.

එම බෝම්බ ප්‍රහාරයෙන් එක් පොලිස් නිලධාරියෙක් ජීවිතක්ෂයට පත්විය. තවත් කිහිප දෙනෙක් තුවාල ලැබූහ. බෝම්බකරු කුලී රථයකින් ගමන් කරමින් සිටිද්දී, පොලිස් නිලධාරීන් රථය නවත්වා එය සෝදිසි කිරීමට යෑමේදී පසුපස අසුනේ අසුන්ගෙන සිටි බෝම්බකරු බෝම්බය පුපුරුවාගෙන ඇත.

එම ප්‍රහාරයේ වගකීම පාකිස්තාන තලේබාන් සංවිධානය බාරගත්තේය. පාකිස්තාන තලේබාන්වරුන්, ඇෆ්ගන් තලේබාන්වරුන්ගෙන් වෙන්වුණු වෙනම කණ්ඩායමකි. ඇමෙරිකන් හමුදා පිටවී යෑමෙන් පසු ඇෆ්ගනිස්තානයේ රජයක් පිහිටුවා ඇත්තේ මෙම තලේබාන්වරුන්ය. අදහස් අතින් එකිනෙකාට වෙනස් වුවත්, පාකිස්තාන තලේබාන්වරුන් සහ ඇෆ්ගන් තලේබාන්වරුන් අතරේ ඇයිහොඳයිකම් පවතී.

Leave a Reply

Your email address will not be published. Required fields are marked *