ඛනිජ තෙල් වෘත්තීය සමිති තීරණයක් ගනී
ලංකා ඛනිජතෙල් නීතිගත සංස්ථාව පෞද්ගලීකරණයට එරෙහිව ඊයේ ආරම්භ කළ සත්‍යග්‍රහය අද (28) පස්වරුවේ නවතා වැඩවර්ජනයක් ආරම්භ කළ බව ඛනිජ තෙල් වෘත්තීය සමිති එකමුතුව පවසයි.
මේ අතර ඔවුන් බවුසර් සඳහා ඉන්ධන පිරවීමෙන් ද ඉවත්වී සිටින බවට බවුසර් හිමියන් චෝදනා කරයි.
ලංකා ඛනිජතෙල් නීතිගත සංස්ථාව පෞද්ගලීකරණයට එරෙහිව ඛනිජ තෙල් වෘත්තීය සමිති එකමුතුව ඊයේ පෙරවරුවේ මෙලෙස සත්‍යග්‍රහයක් ආරම්භ කරනු ලැබීය.
ඒ ලංකා ඛනිජතෙල් නීතිගත සංස්ථාවේ සංස්ථාවේ කොලොන්නාව නිමාව ඉදිරිපිටදීය.
ලංකා ඛනිජතෙල් නීතිගත සංස්ථාව පෞද්ගලීකරණයට එරෙහිව ඛනිජතෙල් වෘත්තීය සමිති එකමුතුව අද පෙරවරුවේ දෙවන දිනටත් සත්‍යග්‍රහයේ යෙදී සිටියේය.
අනතුරුව අද දහවල් කෑම පැයේදී වෘත්තීය සමිති නායකයින් ලංකා ඛනිජතෙල් නීතිගත සංස්ථාවේ සංස්ථාවේ කොලොන්නාව නිමාවේ සේවකයින් ඇමතුවේය.
පසුව වෘත්තීය සමිති නායකයින් නිමාව පරිශ්‍රයට ඇතුළු වීමේ පිවිසුම් දොරටු වසා දැමීමට පියවර ගෙන තිබුණි.
අනතුරුව යළි එහි පිවිසුම් දොරටු විවෘත කෙරුණද වෘත්තීය ක්‍රියාමාර්ගයන්ට සමගාමීව බවුසර් සඳහා ඉන්ධන පිරවීම නිමාව සේවකයින් විසින් අත්හිටුවනු ලැබීය.
ඉන්ධන පිරවීම අත්හිටුවීමත් සමඟ බවුසර් රියදුරන් සිය බවුසර් ගජබාපුර ප්‍රදේශයේ ගාල් කර තිබුණු ආකාරය දක්නට ලැබුණු බව අප වාර්තාකරු පැවසීය.
මේ අතර ඛනිජ තෙල් වෘත්තීය සමිති එකමුතුව අද පස්වරුවේ පැවැත්වු සාකච්ඡාවකින් පසුව සත්‍යග්‍රහය අවසන් කිරීමට පියවර ගත්තේය.
කෙසේ වුවත් තමන් බවුසර් සඳහා ඉන්ධන පිරවීමෙන් සහ බෙදාහැරීමෙන් ඉවත් වී අඛණ්ඩ වැඩ වර්ජනයක් ආරම්භ කරන බව ඛනිජ තෙල් වෘත්තීය සමිති එකමුතුව වැඩිදුරටත් සඳහන් කළේය.
මේ අතර ලංකා ඛනිජ තෙල් නීතිගත සංස්ථාව විකුණන බවට සිදුවන ප්‍රචාර අසත්‍ය බව ජනාධිපති වෘත්තීය සමිති අධ්‍යක්ෂ ජනරාල්වරයා පැවසීය.
